PPren eta PSEren arteko hitzarmenaren berri jakin zenean, Lokarrik bere kezka agertu zuen bake eta bizikidetza hobetzeko politiketan izan zezakeen eraginarengatik, izan ere, elkarrizketari eta akordioari uko egiten dion jarreran oinarrituriko aldebakarreko modeloa ordezkatzen eta defenditzen jardun baita PP. Hala eta guztiz ere, Lokarrik espero du gobernu berriak biziki lan egitea bakea lortzearen alde eta herritarrek kontsulta batean berretsiko duten akordio batera iristearen alde, PSEk hauteskundeetara aurkeztu zuen programan zehazki jasotzen zen bezala. Lokarritik prentsa-aurreko hau aprobetxatu nahi dugu gobernu berriari gure lankidetza eskaintzeko aipatu helburuak lortzeari begira. Hala, gaur bertan gutun bat iristarazi diogu Lopez Lehendakariari gure lankidetza eskainiz eta proposatuz hiru jarduera printzipio eta hamar proposamen zehatz aurrera egiteko bakearen eta bizikidetzaren hobekuntzaren alde.
Hiru printzipio aurrera egiteko bakearen eta bizikidetzaren hobekuntzaren alde
1- Giza Eskubideen legitimazio aktiboa eta sufrimenduaren amaiera.
Euskal herritarren Giza Eskubideekiko errespetua bermatzea izan behar du Gobernu berriaren betekizun nagusia. Giza Eskubideak osotasun zatiezina dira eta ez du inongo tokirik eskubide horien urraketa justifikatzen duen ezen aitzakiarik. Gure gizartean sektore sozial zabalek pairatzen dute sufrimendua ETAren indarkeriaren eta mehatxuen ondorioz. Preso dauden pertsonen sakabanaketak eta tortuaren prebentzio eskasak ere arrazoirik gabeko sufrimendua sorrarazten dute. Amaiera jarri behar zaio sufrimendu horri.
2- Bazterketarik gabeko elkarrizketa eta akordio plurala.
Euskal gizartean bizikidetza hobetzeko, beharrezkoa da sektore guztiek bizitza politikoan aukera berdintasunean parte-hartu ahal izatea. Ezker Abertzalea, Batasunak ordezkatuta, baztertzeak oinarrizko askatasun demokratikoak murrizten ditu eta balizko akordioetatik landa uzten du herritarren zati garrantzitsu bat. Beharrezkoa da komunikazio eta elkarrizketa esparruak zabaltzea, zehaztuz eta adostuz joateko gure bizikidetza desitxuratzen duten kontuei buruzko akordio bat posible egingo duten pausoak.
3- Herri-partaidetzaren sustapena.
Herri-partaidetza ezinbestekoa da bakearen eta bizikidetzaren aldeko lanean. Lehenik eta behin, zilegi egiten baitu gure desadostasunak konpontzeko eta gizarte bezala batzen gaituena bilatzeko bide demokratikoa. Herritarrek beren iritzia eta nahia adierazteko aukera ezberdinak zabaltzen diren heinean, gero eta toki txikiagoa uzten da justifikatzeko indarkeria gure gizarteak pairatzen dituen arazoei aurre egiteko bide bakarra dela. Bigarrenik, partaidetzak prozesua desblokeatzen laguntzen duelako, izan ere, bakearen eta normalizazio politikoaren alde aurrera egiteko konponbide zehatzak eskaintzen ez diren bitartean, herri-partaidetza tresna baliagarria eta bideragarria da bake eta normalizazio prozesua ahalbidetuko duten baldintzak finkatzeko.
Hamar proprosamen zehatz aurrera egiteko bakearen eta bizikidetza hobetzearen alde
Lokarriren iritzian, printzipio eta proposamen hauek gida egokia dira garaile eta garaiturik gabeko konponbide bat bilatzeko, konponbide plurala, desadostasunak errespetatuko dituena, akordioak bilatuko dituena eta gizartearen gehiengoen nahiekiko errespetua bermatuko duena. Kontrakoak askatasunak baztertu eta murriztu dituen aldebakarreko estrategietara itzultzea esan nahi du. Konponbide partekatuak gauzatzeko gaitasun gabezia erakutsi duten estrategietara itzultzea alegia.
2009ko maiazaren 15ean